Maraatuu Haqaa

Gaafan qullaa deemu

Ati uffattee deemta

"Maraatuu" naan jechuu malee

Maafan akkan maraadhe

Na gaafattee beektaa?

Maal taate jetteettaa?

Ani afuuffee miti

Kan qilleensan guutame

Ani hattuu miti otoon waan namaa hawwuu

kan sammuu fuudhame

Ani albaadhessa miti

Kajeeltuu waan raqaa

Ani maraatudha

Maraatuu ilma haqaa

Jireenyaan wal dhabee

Jiraa hin jirre ta'ee

Dhuhaafan maraadhe

Dhugaafan raata'ee

-

Sobatu hiita'ee akka tulluu guddaatti ol jedhee dhaabbate

Biyyimmoo itti yaa'ee galgalaaf ganama ho'asaa qaammate

Sobaaf wal ga'iin taa'amee hiriirri ba'ameefi

Cidhi itti godhamee - itti shubbifamee

Harki dhahameefi!

Namni soba kabaje 

Namni soba faarse

Qumbii itti firfirse

Ixaana' itti aarse!

-

Dhugaanimmoo haqaaqamee karaarraa jallate

Akka muka qiinqaniin nyaatetti soofamee qallate

Ni ukkaamame- ni sakaalame

Dhoksaatti affeelamee

Dhoksaatti akaa'ame

Dukkana walakkaa

Gorduuba kaa'ame!

Aarsaa dhugaaf ba'etu

Jallinaan qorqame

kan kabajni maluuf

kabaja dhorkame!

-

Hammeenyiifi gidiraan

Kokkeetti na qabe

Biyya abbaa koorrattan

Abbaa ta'uu dhabe

Galaana imimmaanitu

Jiraa na awwaale

Madaan koo baayyannaan

Hooqqachuu wallaale...

Waa'een maraatummaafi

Waa'een caba kootii

Gaaffii deebii dhabe

Gaaffii saba kooti!