HARKA KEETTI DU'EE

Angafa durbootaa

Mootii bareedinaa

Waardiyyaa onnee koo

Ati naaf ulfina

Bareedina taanaan

Maaltu siin wal gita

Sinboon kee alaalaa

Eenyummaa koo bita

Walgeettin nyaara kee

 Konkonni funyaanii

Qallinni mudhii kee

Addeenyi ilkaanii

Ijji kee gurguddaa

Mudhiin kee kan sonsaa

Ijjannaan koomee kee

Miira kan koo onsaa

Faaya kennaa addaan

 Uumaan tolchee uume

Otoon akka shaamaa

Sumaaf baqee dhume

Otoo siif eegduu tahee

Si na eegsisanii

Otoo cinaa kan kee

Ana teessisani

Otoon carroometoo

Duukaa kan kee buhe

Harka keetti qorree

Harka keetti du'e